by Yoyo Abayan, Sports Editor
CEBU, Philippines - Mobalik na sa Cebu Schools Athletic Foundation Inc. (CESAFI) ang kanhi presidente sa Cebu Football Association nga si Jonathan 'Maxi' Maximo, apan dili na tournament manager kun dili promoter sa football event.
Gumikan sa uban mga obligasyon, si Maximo mibalibad sa pagdawat sa posisyon isip tournament manager, apan motabang lang siya pag-promote sa premiere inter-school league dinhi sa Sugbu.
"Wala nako gidawat ang tournament manager position. Tabang lang ta kay nisangpit man ang CESAFI. Lisud balibaran ang CESAFI kay na varsity baya ta sa una pud nya na libre atong tuition," matud pang Maximo.
Tungod niini, gipahinumduman ni Maximo ang tanang partisipanteng tunghaan sa screening sa mga players karong alas-10 sa buntag diha sa University of Southern Philippines Foundation sa Brgy. Lahug.
Sa CESAFI football, ang matag koponan moduso og 20 ka players. Kun ang player nga ilang naduso mahibaw-ang ineligible, ang coach dili na makapuli og laing player. Pananglitan, siyam sa iyang players ma-disqualified, ang nahabiling 11 ka players mao na lang ang moduwa. – BANAT NEWS
No comments:
Post a Comment