BABAYENG SIKLESTA IKATULO SA MEN'S CATEGORY

source: Sun Star Superbalia Newspaper, Dec. 27, 2016 Tuesday issue

MAXIMO, YOUNG RIDER AWARDEE SA GRANDIA TOUR

SUGBOANON MO-REPRESENT SA PILIPINAS

(click to enlarge)

 

Published in Superbalita Newspaper on Nov. 23, 2012 Friday issue
by Jun B. Migallen, Sports Editor

Ang Sugboanon ug batan-ong atleta makabaton na unya og kahigayonan nga maka-represent sa nasod di lang kausa kon dili sa duha gyud ka sports.

Ang 17-anyos nga si Luis Miguel "Igimax" Maximo sa Ateneo de Manila University, kasamtangang miyembro sa Philippine Junior Cycling Team, ang nalakip sa Philippine Junior Duathlon Training pool nga magrepresent sa nasod sa 2012 Asian Duathlon Championships karong Dominggo.

"Igimax will have a special role in the team," matod ni coach Melvin Fausto.



 

Si National triathlon coach Melvin Fausto mibisita sa Sugbo sa niaging semana aron pag-organize og national grass roots development sa TRAP ngadto sa nagkalainlaing siyudad ug lungsod.

Ang proyekto makahatag og saktong popularidad sa maong sport ug ingo man pagdiskobre sa mga batan-on ug potensiyal nga mga triathletes. JBM

IGI NAKAGUKOD SA 3RD PLACE

(click to enlarge)

Published in Super Balita Newspaper on August 24, 2012 Friday issue
by Jun Migallen, Sports Editor

Bisan pa man og nabiyaan sa puntos human wa makaapil sa unang leg, apan ang Sugbuanong 17 anyos nga si Miguel "Igimax" Maximo nakamaniho gihapon sa pagpatong sa 3rd place sa over all standing human sa ikatulong legs sa men's 16-19 division sa Powerade Philippine Duathlon Series sa niaging Domingo didto sa Sta. Elena City, Sta. Rosa, Laguna.

Ang mga partisipante sa maong kompetisyon motadlas og 7-km nga dagan, 35-km nga biseklita ug 3.5km nga dagan na sab.

"It's not easy to compete for s series event because you lose points if you miss a leg," matod ni Igi kinsa miyembro sa PHL Natl Junior Cycling team.

Tungod sa kataas sa biyahe ug ingon man sa logistic support, si Igimax wa makaapil sa first leg apan nakabawi kini sa niaging duha ka legs.

"I hope to complete the 4th and final leg this October and maintain my standing.  It's tough but I always look forward representing Cebu in a national race," niya pa.

Sa niaging Domingo, si Igimax mitadlas sa finishing line sa oras nga 31:54 minuto sa unang dagan, 1:03:24 nga biseklita ug 20:32 minutos nga dagan. JBM

LBC EXPRESS MISUPORTA NI MAXIMO

(click to enlarge)

Published in Super Balita Newspaper on Jan. 16, 2012 Monday issue
Jun Migallen, Sports Editor

Ang LBC Express, nang no. 1 courier company sa nasod, maoy uwahing kompaniya nga moitsa sa ilang suporta sa batan-ong Sugbuanong siklista nga si Luis Miguel "Igimax" Maximo sa YKKBikes sa dihang gihatagan kini og slot nga makaapil sa exclusive U-23 Elite Training Camp sa Enero 11 ngadto sa Pebrero 9, 2012 sa Subic Bay, Olongapo City, Zambales.

Ang camp gidesinyo alang sa mga elite cyclists sa U-23 o kadtong mga nagpangidaron og 19-22 anyos kinsa nasipatay nga adunay exceptional performance atol sa 16 ka adlaw nga 12 ka stage sa 2011 Ronda Pilipinas Tour.

MAXIMO NAKA-GOLD SA TOUR NI FRANK

(click to enlarge)

Published in Super Balita Newspaper on Jan. 10, 2012 Tuesday issue
by Erwin S. Lirazan, Staff Writer
Jun Migallen, Sports Editor

NAPRESERBA sa 16 anyos nga si Luis Miguel “Igimax” Maximo sa YKKBikes ang dungog sa Cebu cycling dihang nakalangkat siya’g gold medal sa 1st Tour Ni Frank Junior Cycling race ning bag-uhay.

Kini maoy labing unang higayon nga gilakip ang Junior Category sa lumba nga nanukad sa lungsod sa Balamban unya misubay sa Trans Central Highway ug nahuman sa bukirang barangay sa Busay, Cebu City.

Gawas sa Junior, ang ubang mga kategoriya nga gikombatihan sa lumba mao ang Open B ug Open C.

“It was Igi’s local knowledge of the race route in Trans Central Highway that spelled the difference. It was a tactical race,” batbat ni Fil-Am organizer Frank Gatdula.

“I was following them, and I can see that he was letting his opponents go first at a fast pace, then attacked in a crucial part of the route - a killer climb. He was never caught after that and soloed to victory.”

Lakip sa gilupig ni Maximo mao si Miguel Gonzales sa Manila, kinsa maoy overall junior champion sa 2011 Pilipinas Cycling League (PCL).

Si Gonzales igo lang miangkon sa ikaduhang dapit unya ikatulo si Dexel Chu.

Nagkanayon si Maximo nga mapasigarbuon gyud siya nga nakuha niya ang bulawang medalya hilabi na kay dinhi sa Sugbo gipahigayon ang lumba.

Gipasabot ni Maximo, Paref Springdale School Student Council president, nga grabe gyud ang iyang preparasyon alang ning lumbaa ug malipayon siyang wala nausik ang iyang paningkamot. Sa sunod semana, molarga na paingon sa Manila si Maximo aron moapil sa ensayo sa Philippine National Junior team diin bag-uhay lang siyang nahisakop.

Gipatik sa mantalaang SuperBalita Cebu Enero 10, 2012.

SUGBUANON GIKUHA SA RP TEAM

(click to enlarge)

Published in Super Balita Newspaper on Jan. 3, 2012 Tuesday issue
by Erwin Lirazan, Staff Writer
Jun Migallen, Sports Editor

NATUMAN na ang pangandoy sa 16 anyos nga siklista nga si Luis Miguel “Igimax” Maximo nga mahisakop sa Philippine Team nga maghatag kaniya og kahigayunan nga makarepresentar sa nasod alang sa nagkadaiyang international cycling competitions.

Si Maximo, awardee sa Sportswriters Association of Cebu (SAC), maoy labing batan-ong sakop sa national team ug bugtong junior cyclist nga gikan sa Visayas ug Mindanao.

Ang 7-time Athlete of the Year awardees sa Paref Springdale School usa ka kanhi football player diin kanhi team captain siya sa Paref football varsity team.

Sa miagong duha ka mga tuig lang nakadesider si Maximo nga mobalhin sa cycling ug gikan niadto, wala na’y undang ang iyang kalambuan hangtod nga naabot siya ning puntoha.

Ang PhilCycling, UCI-recognized National Sports Association (NSA) sa RP cycling nga gipangulohan ni Mayor Abraham Tolentino, nagpahigayon og duha ka nationwide qualifying rounds alang sa National Junior Trials.

Ning maong mga kompetisyon nadiskubrihan ang talagsaong talento ni Maximo isip usa ka siklesta.

Sa Tour of Clark niadtong Nobiyembre sa Clark, Pampanga nga maoy preliminary round sa Juniors 16-17, si Maximo milabni na sa 2nd place sa Individual Time Trial (ITT) 10km ug 3rd place over-all sa General Classification standings.

Sa Tagaytay Trials, nakapuwesto gihapon sa ikaunom si Maximo bisan wala kaayo kini nakatutok sa preparasyon tungod sa kakapoy sa biyahe ug pressure sa iyang mga gimbuhaton sa tunghaan.

Nagkanayon si Maximo nga wala siya magtuo nga matuman ang iyang pangandoy nga makasulod sa RP team niini pa lang ka sayo.

Gipatik sa mantalaang SuperBalita Cebu Enero 03, 2012.

16 ANYOS NGA SUGBUANON MOAPIL SA ORMOC ROAD RACE

(click to enlarge)

Published in Super Balita Newspaper on October 9, 2011 Sunday issue
by Jun Migallen, Sports Editor

HUMAN sa iyang panikaysikay sa dakbayan sa Tagbilaran, Bohol, ang Sugboanong junior cyclist nga si Luis Miguel “Igimax” Maximo sa YKKBikes mosalmot na usab sa 70km Road Race sa Ormoc City Bike Tour karong Oktubre 9, 2011.

Ang 16-anyos nga estudyante sa Paref-Springdale School ug ingon man awardee sa Sportswriters Association of Cebu (SAC) nagtinguha og maayong resulta sa nahisgutang kompetisyon sanglit kini maoy una niyang pagsalmot sa maong lumba bisan pa man og di niya sinati ang rota.

Hinuon, ang 3-time junior 15-U champion sa Phil. Premiere Cycling League ug 7-time Athlete of the Year sa Springdale School masaligon nga iya kining makab-ot ug ang iyang pagdaog sa junior title sa bag-ong natapos nga Tour of Bohol sa niaging buwan maoy makapataas sa iyang moral.

Ang lumba motadlas sa 70 km. nga gilay-on gikan sa Ormoc City Plaza moaging sa Merida hangtod na sa lungsod sa Milagro.

“I like the terrain of the race route. It will end with a climb in the last 14km to Lake Danao. My training in Busay Hills will definitely help me propel to the finish. Once again, Im proud to race for Cebu!” matod ni Igimax.

Ang pagsulod sa top 10 bisan pa man sa pagsalmot sa mga beterano ug eksperiyensiya gikan sa Ormoc, Cebu ug sa Visayas maoy target ni Maximo. Kini gipasiugdahan sa Ormoc City Medical Society Bike Tour nga gipangulohan ni Dr. Gatchalian.

Si JV Araneta uban sa defending champion nga si Art Lambo, triathlete Andrew Ong, Cesar Salazar ug ang ubang mga Cebuano Cycling executive riders maoy mangulo sa Cebu delegation.

THE FIRST YELLOW JERSEY

Bicycling.com What would the Tour de France be without the yellow jersey? Until 1919 there was no jersey handed out to the winner. It was not until midway through the 1919 race that organizers heeded to the pressure of the press to make the race leader more visible. Fittingly, they chose yellow as the distinctive tunic, a nod to the color of their newspaper, "L'Auto." The first jersey went to Eugene Christophe, one of the top riders of his generation... Read more 

Oh by the way, Sun Star Cebu & SuperBalita wear yellow too.

IGIMAX MOATAK SA RIZAL

Published in Sun Star Superbalita on Jan. 23, 2011 Sunday issue
by Erwin Lirazan, Staff Writer/Sports Editor

Mosulong ang batan-ong Sugbuanong rider nga si Luis Miguel "Igimax" Maximo sa Mabitac, Rizal, Philippines alang sa Tour of Jala-Jala.

Ang 15 anyos nga 3-time junior champion sa Philippine Premiere Cycling League (PPCL) series makigparang og mga siklesta nga maguwang kaniya.

Apan bisan pa niini, malaumon si Maximo nga makaparang siya'g insakto.

Gipasabot sa 3rd year high school student sa PAREF Springdale School nga dakong hagit alang kaniya ang pagsalmot ning maong lumba. ESL

SURBAN HARI SA TOUR NI FRANK

Click to enlarge

Published in Sun Star Superbalita News on Jan 10, 2011 Monday issue
by Jun Migallen, Sports Editor

SUBLING gipatugbabawan ni Nino Surban kagahapon ang Tour ni Frank aron langkaton ang over-all title men’s Category A nga nanukad sa City Hall sa dakbayan sa Toledo, miagi sa Trans Central Highway ug gitapos diha sa Buak, Busay Hills, Cebu City.

Si Nino, lumad nga taga Danao City, kinsa mao usab ang nanghawod sa Stage 1 nakahakot og 25 puntos sa rota nga mitadlas og 55 ka kilometros, 36 niini ubos sa makutas ug tungason nga rota sa Transcentral Highway.

Nagsunod kaniya si Rolly Cabaluna nga may 20 puntos ug ikatulo usab ang beteranong si Nilo Barbaloce (16 pts.), ikaupat si Adan Abrenica (13 pts.) ug Elmer Navarro (11 pts.)

Sa men’s category B, ang triathlete nga si Elmo Clarabal mao usab ang mipatigbabaw, nagsunod sila si Jonas Ponseca, Ramon Espinosa, John Christopher Gaspar ug Danny Sena.

Wa usab magpabitin ang langyaw nga si Adri Van Dongen sa Holland sa dihang iyang gidominar ang men’s category C. Si Dongen maoy usa sa tulo ka foreign entries samtang laing duha gikan sa Japan sa Category A ug C.

Nagsunod kaniya si Ronnie Adlawan, ang 5th placer sa Stage 1 Criterium, ug maoy bugtong nakasulod sa winners pudiom sa Stage 2 nga gani ang Stage 1 leader nga si Tata Ty wa masulod sa top 5.

Ikatulo si Raffy Bacayo, dayon nagsunod si Ryan Ocanada ug ikalima ang pinakabatang entrante, ang 15 anyos nga si Luis Miguel “Igi” Maximo nga gipaluyohan sa YKK Trading.

Ang uwan, kadangog sa kalsada ug ingon man ang kabaga sa gabon maoy naghatag og kalisdanan sa mga partisipante sa kompetisyon nga gi-esponsoran sa Fil-Am nga si Frank Gatdula sa Stockton, CA.

TOUR NI FRANK.  Makutas ug tungason nga rota sa Transcentral Highway nga sama ning makita sa ibabawng hulagway ang gilatas sa mga partisipante sa Stage 2 sa Tour ni Frank nga natapos kagahapon.  (Published in Sun Star Super Balita on Jan. 10, 2011 Monday issue)

UC NIPILDI SA UV, 1-0, SA FOOTBALL

Published in Sun Star Superbalita on Sept. 7, 2010 Tuesday issue
by Erwin Lirazan, Staff Reporter
Jun Migallen, Sports Editor

Nahimong bayani si Clarence Rosco sa kadaugan sa University of Cebu (UC) batok sa University of the Visayas (UV), 1-0, sa main game sa miaging adlaw sa Cebu Schools Athletic Foundation, Inc. (Cesafi) football event University of San Carlos-Technology Center football field.

Si Rosco nimugna sa nag-inusarang goal sa duwa ika-50 minutos sa kulbahinam nga pinatiray.

Hugot man tuod ang kombati apan dili kini hugaw dili sama sa panagharong sa USC ug University of Southern Philippines Foundation (USPF) sa premirong duwa nga gibahad og red cards.  Midaog ang USC, 3-0, ning kombatiha.

Sa UC-UV nga sanka, bugtong ang sakop ra sa UC nga si Marvin Torrepalma ang natawgan og red card.

Hinuon adunay tulo ka mga magduduwa nga natawgan og yellow card ug kini mao sila si Shelo Mangubat sa UV, Jessie Puno ug Raffy Abano sa UC. ESL

SUGBUANON IKA-14

Published in the Superbalita Newspaper March 24, 2010 Wednesday issue
by Erwin Lirazaon, Staff Writer
Jun Migallen, Sports Editor

NASAKMIT sa Sugbuanong si Luis Miguel “Igi” Maximo ang ika-14 nga dapit sa 14-below division sa Los Angeles 5K Marathon sa miaging adlaw sa Dodger Stadium sa LA, California.

Si Maximo, kinsa mi-oras og 25:49, maoy nipatigbabaw sa tanang mga Pinoy nga ningsalmot sa kompetisyon nga gisalmutan og kapin sa 3,000 ka runners.

Sa kategoriya ni Maximo, adunay 115 ka s nga nakahuman.

Malipayon man tuod siya sa iyang naabot apan nagtuo si Maximo nga kon naanad pa siyang daan sa klima sa Los Angeles, nga tugnaw kaayo sa kasamtangan, hayan posibleng mas motaas pa ang iyang oras.

Sa iyang mensahe pinaagi sa email, nagkanayon si Maximo nga wala kaayo siya paningta og maayo unya wala sab siya giuhaw tungod sa katugnaw sa panahon.

Gitataw niya lahi gyud kaayo ang iyang pamati kumpara sa mga kompetisyon nga iyang gisalmutan dinhi sa Pilipinas.

Si Maximo, kinsa usa ka kanhi football player, giimbitar sa lumba human sa iyang back-to-back nga kalampusan sa 2010 Philippine Cycling competition.

Nagsuporta kang Maximo ning maong torneyo mao ang negusyanteng si Zandro Fajardo, tag-iya sa Oz Racing.

Gipatik sa mantalaang Sun.Star Superbalita Cebu sa Marso 24, 2010.

IGI MILAMPOS PAGDEPENSA SA IYANG PPCL JUNIORS TITLE

Published in Super Balita Newspaper Feb. 23, 2010 Tuesday issue
by Erwin Lirazan, Staff Writer
Jun Migallen, Sports Editor

Malampusong nadepensahan sa Sugbuanong si Luis Miguel "Igi" Maximo ang iyang junior division title sa miaging adlaw sa 2010 Philippine Premiere Cycling League (PPCL) sa Nuvali, Sta. Rosa City, Laguna.

Ning maong kadaugan, napamatud-an sa 14 anyos nga high school student sa Springdale School nga dili taphaw ang iyang pagkampiyon sa premirong edisyon sa lumba nga gipahigayon niadtong Enero 31 sa Macapagal Avenue Paranaque City.

Ang mapasigarbung amahan ni Igi nga si Jonathan Maximo, kanhi presidente sa Cebu Football Association (CFA), nga mas daghan ang nangapil ning higayuna hinungdan nga mas hugot ang kompetisyon.

Moabot ngadto sa 274 ka mga seklista gikan sa 33 ka teams ang nangapil karon, kadaghanan niini mga triathlete sa Luzon.

Apan wala gyud nagpatay-og si Igi sa kahugot sa kompetisyon ug napatigbabawan gyud niya ang iyang kategorya nga adunay tulo ka events - criterium, individual time trial (ITT) ug team time trial (TTT).

Si Igi, kinsa gisuportahan sa Oz Racing Corporation nga gipanag-iya ni Zandro Fajardo, usa ka magduduwa sa football event.

Apan dili pa lang gyud kaayo tantong dugay, nabaling ang iyang hilig ngadto sa cycling nga gisuportahan usab sa iyang amahan.  ESL

OZ RACING MOSUPORTA NI MAXIMO

Published in the Super Balita Newspaper Feb. 22, 2010 Monday issue
by Erwin Lirazan, Staff Writer
Jun Migallen, Sports Editor

SUPORTAHAN sa Oz Racing Corporation ang sumosulbong nga cyclist sa Sugbo nga si Luis Miguel "Igi" Maximo, kinsa nikulit og pangalan dihang nasakmit niya ang junior title sa 2010 Philippine Premiere Cycling League (PPCL) niadtong Enero 31 sa Macapagal Avenue sa Paranaque City, Manila

Ang amahan sa 14 anyos nga high school student sa Springdale School nga si Jonathan Maximo nagkanayon nga mismong ang tag-iya sa Oz Racing nga si Zandro Fajardo ang mitanyag nga mosuporta sa iyang anak.

Gipasabot ni Maximo nga personal nga nakasaksi si Fajardo sa kalampusan ni Igi sa PPCL hinungdan nga nakahukom kining mosuporta.  Sa tanyag ni Fajardo, ang iyang kompanya mao nay mohatag kang Igi nga sul-ubon niini sa matag lumba nga iyang salmutan sama sa jersey, bibshorts ug shoe covers.

"Kinsa man diay ang magtinabangay kundi ang mga bisdak ra!  What is heartwarming of the support is it came from a Cebuano company for a Cebuano athlete," matod pa ni Maximo.

Ang supresang kadaugan ni Igi sa PPCL maoy nakahatag kaniya luna sa Liquigas Junior Cycling Team, usa ka developmental squad sa bantugang kompanya sa tibuok kalibutan nga mao ang Liquigas.  ESL

SUGBUANON MIDOMINAR SA PHILIPPINE CYCLING

Gipatik sa mantalaang Sun.Star Superbalita Cebu sa Pebrero 2, 2010.
Ni Erwin S. Lirazan, Staff Writer
Jun Migallen, Sports Editor
Link: http://www.sunstar.com.ph/cebu/sugboanon-midominar-sa-philippine-cycling

NAKAMUGNA og pangalan ang batan-ong si Luis Miguel “Igi” Maximo sa national cycling human niya nasakmit ang juniors category title sa Philippine Premier Cycling League (PCCL) niadtong Dominggo sa Macapagal Avenue sa Parañaque City, Manila.

Ang 14 anyos nga high school student sa Springdale School nihuman sa 13 km. nga lumba pinaagi sa oras nga 21:41.67. Lakip sa mga gipanglupig ni Maximo mao si Allen Santiago, kanhi sakop sa RP junior triathlon squad, kinsa igo lang misakmit sa ikaduhang puwesto.

Si Luis Miguel "Igi" Maximo nag una ning aktoha sa Philippine Premiere Cycling League juniors category nga gipahigayon didto sa Paranaque City, Manila.  (Super Balita Nespaper Feb 2, 2010 Tuesday issue)

 

Sa sinugdanan pa lang, nasayran nga sikit nang nagginukdanay sila si Maximo ug Santiago.

Adunay mga higayon nga mosuway’g biya si Santiago apan migukod gyud si Maximo.

Sa hinapos nga bahin, kalit mibulhot si Maximo aron angkunon ang korona. Nagkanayon ang amahan ni Maximo nga si Jonathan “Maxi” Maximo, kanhi presidente sa Cebu Football Association (CFA), nga ang pagduwa sa iyang anak og football kanhi nakatabang gyud og dako sa kadaugan.

“Mura’g mao-mao ra man gud kay pareho mang tiil ang gamit sa football ug cycling. Gikan sa football, nag-cycling si Igi. Dili na kaayo lisod para niya kay the endurance is there already,” matod ni Maxi. ESL

USJ-R 11 SA FINALS

Courtesy of Sun Star Superbalita Newspaper (http://www.sunstar.com.ph/)
Sunday, November 16, 2008 issue

by Erwin S. Lirazan, Staff Reporter

Jun Migallen, Sports Editor

NAKAABANTE pagbalik sa finals ang defending champion University of San Jose Recoletos (USJ-R) Kicking Jaguars human nila gisuban pagpukan ang University of San Carlos, 1-0, kagahapon sa semi-finals sa college division sa Cebu Schools Athletic Foundation Inc. (CESAFI) football event sa University of San Carlos-Technological Center sa Brgy. Talamban, Cebu City.

Ang USJ-R, nga ninglupig sab sa USC, 2-0, sa eliminasyon, nakamugna sa ilang bugtong puntos sa pisikal kaayo nga duwa sa ika-62 minutos gikan kang Adrinne Mejaran.

Pisikal gyud kaayo ang panagsangka, gani pito ka mga magduduwa ang natawgan og intentional foul (yellow card).

Natawgan og intentional foul sa kampo sa USJ-R mao sila si Franco Cedullo, Paul Niño Dela Victoria ug Nolie Enterio samtang sa kampo sa USC mao sila si John Tirol, Joel Villegas, Melvin Elle ug Sean Gacayan.

Ning pagsuwat, padayon pang nagpinatiray ang no.1 team Uiversity of Southern Philippines Foundation (USPF) ug University of the Visayas (UV) sa laing semis game. (ESL)

DBTC 11 HARI

Courtesy of Sun Star Superbalita Newspaper (http://www.sunstar.com.ph/superbalita)

Sunday, October 19, 2008 issue

by Erwin S. Lirazan, Staff Reporter

Jun Migallen, Sports Editor

SUKWAHI sa gilaumang kulbahinam nga pinatiray, ningdominar ang Don Bosc9o Technological Center (DBTC) batok sa University of Southern Philippines Foundation (USPF), 3-0, aron depensaan ang ilang football high school division title kagahapon sa Cebu Schools Athletic Foundation Inc. (CESAFI) sa University of San Carlos-Technological Center (USC-TC) field sa Brgy. Talamban, ning dakbayan.

Ang DBTC, nga igo lang midaog og usa ka puntos batok sa USPF sa finals sa miaging tuig, ning higayuna mao gyud ang nagkontrolar sa duwa gikan sa sinugdanan hangtod sa katapusan.

Gani sulod sab gyud sa 17 ka mga higayon nga nakasuway pagpatid ang DBTC pagpasulod sa bola ngadto sa goal - tulo ra hinuoy nasulod - samtang ang USPF kausa ra gyud nakasuway unya sipyat pa.

Ang DBTC, nga nihuman sa kompetisyon nga way pilde sud sa tulo ka mga duwa alang sa kinatibuk-ang siyam ka mga puntos, unang nakapuntos sa ika-29 minutos sa kombati gikan kang Miko Joseph Limalima.

Onse ka minutos ang nakalabay, nakuha sa DBTC ang ikaduha nilang puntos gikan kang James Nacorda.

Unya paglabay sa 15 minutos, laing puntos ang nakuha sa DBTC gikan kang Noel Christian sa ika-65 minutos ug wala na gyud nakabawi ang USPF human niadto.

Ang USPF, nga maoy ningsakmit sa ikaduhang puwesto, nihuman sa torneyo dala ang duha ka mga daog ug usa ka pildi alang sa kinatibuk-ang 6.0 puntos.

Sa laing bahin, nasakmit sa University of San Carlos ang ikatulong dapit human nila gipangpukan ang University of San Jose Recoletos, 3-1.

Unang nakaratsada ang USJ-R dihang nakapuntos si Elijah Abella sa ikatulong minutos pa lang sa duwa.

Sa ika-11 minutos, natabla sa USC ang kombati pinaagi sa puntos ni Ray Vincent Tuadles.

Taudtaod ang kombati una pa nakapuntos si Rex Anthony Catubigan aron ihatag sa USC ang labaw, 2-1, sa ika-48 minutos. Paglabay sa siyam ka minutos, nakapuntos na sab si Tuadles aron inaton ang labaw, 3-1, ug milahos na sila sa kadaugan. (ESL)