Sunday, October 10, 2010

O' HALLORAN HARI SA 1ST VAL2020 TRIATHLON


Published in Banat Newspaper on Oct. 10, 2010 Sunday issue
by Lemuel P. Maglinte, Staff Writer
Yoyo Abayan, Sports Editor

CEBU, Philippines - Gihurot sa pagawas ang tanang kusog ni Canadian pro triathlete Mathieu O'Halloran aron maghari sa 1st Val 2020 Triathlon kagahapon didto sa baywalk sa lungsod sa Naga.

Sayo kaayong gihuman ni O'Halloran ang 1km. swim, 30km. bike ug 7.5 km. run. Iyang gitapos ang lumba sud lang sa usa ka oras, 27 minutos ug 24 segundos. Nagsunod niya si kanhi RP Ironman Noy Jopson nga mi-oras og 1:36.20, si Norte Banjo sa Cagayan de Oro maoy mipahiluna sa ikatulong dapit sa oras nga 1:39.14.

Sa women’s division, si RP team member Lorhiz Echavez mao ang nanghawod human niya gitapos ang lumba sa oras nga 1:47.45, gisundan ni Alyssa Lagahit (2:17.00) ug Jane Ong (2:47.30) alang sa ikaduha ug ikatulong dapit.

Si Ralph Arche sa Sugbutriathlon, maoy midaog sa seniors 20 sa oras nga 1:44.30, gisundan nila ni Kristiane Lim (1:46.09) ug Franz Baguio (2:47.30).

Giangkon sab ni Eugene Sanchez ang korona sa seniors 30 human niya gitapos ang lumba sud sa usa ka oras, 46 minutos ug 09 segundos. Gisundan ni Raymond Bontol (1:47.55) ug Joseph Miller (1:49.45).

Si Douglas Sharpe mipukan ni Pio Salvador Jr. aron maangkon ang unang dapit sa masters 50 sa oras nga 2:13.17. Si Salvador mi-oras og 2:53.40.

Ang magtiayong Tenggoy ug Merly Colmenares miangkon sa una ug ikatulo nga dapit. Si Tenggoy maoy naghari sa sprint masters, samtang si Merly mipahiluna sa ikatulong dapit sa super sprint female nga gidominar ni Rochelle Tan (1:09.12). Si Loveleingell Casidsid (1:14.07) mi-okupar sa ikaduha.

Sila si Tyrone Tan (2:13.17), Job Paul Cereno (2:11.55) ug Arnold Suarez (2:13.17) maoy top three finishers sa male super sprint.

Sa relay-tandem category, ang Team Abellana nila ni Juperson Delos Santos, Edgar Allan Jarina, ug Jeepy Lumungsod maoy naghari, samtang ang Team Max1mo nila ni Mendel Lopez, Luis Miguel Maximo ug Alex Qui maoy miangkon sa ikaduhang dapit, gisundan sa Team Porary nila ni Kristian Garciano ug Ruben Pilapil. (BANATSPORTS)

No comments: