Click to enlarge
by Lemuel Maglinte, Staff Writer
Yoyo Abayan, Sports Editor
CEBU, Philippines - Matay-an pa ang kadina sa bisikleta ni Niño Surban nungka ang iyang abilidad dihang iyang gidominar ang criterium event sa 2011 Tour ni Frank kagahapon didto sa north reclamation area, Mandaue City.
Wala kapiog sa beteranong Cebuano cyclist ang tang-ang Japanese pro rider nga si Kenji Takeya, kinsa wala kalahutay sa kainit sa klima dinhi sa Sugbu.
"It was snowing in Japan when he left, so pag-abot pa lang niya, nireklamo na sa kainit. Wala ka-agwanta although he was with the group of Niño during the race," matud pa ni Miguel Flores sa Cebu Cycling sa The Freeman, ang igsuong mantalaan sa Banat News.
Sulod sa 40 minutos nga walay puas nga tinindakay sa lima ka laps nga adunay 2.3 kilometros nga gilay-on matag usa, si Surban maoy nag-una sa Class A ug gisundan siya ni Elmer Navarro.
Ang kanhi Tour Pilipinas champion nga si Rolando Pagnanawon maoy misakmit sa ikatulong dapit.
Ang Class B, gipangulohan ni Ramon Espinosa uban sa iyang mga runners-up nga sila si Jerome Rodriguez ug Lyndon Caraquel.
Si Tata Ty maoy naghari sa Class C batok nila ni Lito Quebec ug Tata Codina nga mipahiluna sa ikaduha ug ikatulo nga dapit.
Ang labing batang seklista nga si Igi Maximo, 15-anyos, pakyas pagsulod sa top 5, apan mipakita og ngilngig nga performance pinaagi sa paghuman sa lumba uban ang mga beterano ug tang-ang seklista.
Karong adlawa ipahigayon ang katapusang leg sa Tour Ni Frank, ang 60-km road race gikan sa Toledo City subay sa Balamban Transcentral Highway paingon dinhi sa Sugbu. (BANATSPORTS)
Ang fast rising Cebuano junior cyclist nga si Luis Miguel "Igimax" Maximo (tuo) nag-una sa likuon nga bahin sa rota atol sa criterium race sa 2011 Tour ni Frank agahapon didto sa Mandaue City reclamation area. Ang 15-anyos ug tinun-an sa PAREF-Springdale maoy labing bata nga partisipante sa adult/senior competition. (Published in Banat News Jan. 9, 2011 Sunday issue)
No comments:
Post a Comment